SAITH CYNGERDD YN 2010
Bydd 2010 yn flwyddyn anarferol o brysur i`r Glerorfa, Cerddorfa Werin Cymru, gyda saith o gyngherddau bellach wedi eu cadarnhau. Golyga hyn fod yr aelodau, sy`n dod o bob rhan o Gymru, bellach yn cyfarfod yn fisol i ymarfer. Golyga hefyd fod y gwaith gweinyddu a threfnu yn cynyddu`n arw!
Yr uchafbwynt fydd perfformio mewn cyngerdd Celtaidd mawr yng Nghanolfan y Mileniwm ar Galan Mai.
Bydd y cyngerdd cyntaf yn Rhyl ar Fawrth 7fed a`r olaf yn Aberystwyth ar Dachwedd 6ed. Dyma`r rhestr gyflawn:
7 Mawrth - Pafiliwn Rhyl (cyngerdd i godi arian at achosion da, gyda Mark Evans, Côr Rhuthun a Chôr Ysgol Glan Clwyd)
8 Ebrill - Galeri, Caernarfon (fel rhan o`r Ŵyl Delynau Ryngwladol, gyda Sian James)
1 Mai - Canolfan y Mileniwm (gyda Calan, Sian James, Nolwen Korbell, Lleuwen Steffan a Bagad o Lydaw)
2 Gorffennaf - Gŵyl Rhuthun
22 Awst - Gŵyl Tegeingl, Yr Wyddgrug
16 Hydref - Canolfan Ucheldre, Caergybi (cyngerdd agoriadol Gŵyl Gelfyddydau Caergybi)
6 Tachwedd - Canolfan y Celfyddydau, Aberystwyth
Y Glerorfa yw`r gerddorfa gyntaf o`i bath erioed yng Nghymru, gyda’r aelodau i gyd yn perthyn i Clera, Cymdeithas Offerynnau Traddodiadol Cymru. Daeth 40 ohonynt at ei gilydd gyntaf ar achlysur cyngerdd i ddathlu penblwydd Clera yn 10 oed yn Nhachwedd 2006. Yr ymateb brwd i`r cyngerdd hwnnw a arweiniodd at sefydlu`r Glerorfa o ddifri ac at y datblygu a fu wedi hynny. Erbyn hyn mae nifer yr aelodau wedi codi i 60, gyda 30 arall wedi gwneud cais i ymuno.
Nod y Glerorfa yw cyflwyno alawon traddodiadol Cymru - yn ogystal ag alawon newydd, gwreiddiol gyda naws draddodiadol - mewn dull newydd a hwyliog, a thrwy hynny fywiogi`r byd gwerin yng Nghymru drwyddo draw.
Cyfarwyddwyr Cerdd y Glerorfa yw Stephen Rees (Cadeirydd Clera) a Robin Huw Bowen.
Am ragor o fanylion cysylltwch â:
Stephen Rees 01248 600427
neu Robin Huw Bowen 01970 627458
|
